Ser avogado nestes tempos é algo así como ser xornalista nunha guerra.

Levo moito censurando con amigos e compañeiros condutas que calquera que teña sentido común vería como inaceptables nun país normal.

Todo o mundo sabe que un xuíz instrutor é competente en función do lugar onde se comete o delito. Isto vén do comezo da democracia, da Revolución francesa onde se consagrou o dereito a un xuíz imparcial, o que che tocase. Consecuentemente, un xuíz de Ourense non é competente en Lugo, aínda que o que investigue sexa absolutamente censurable e ilegal. Debería reflexionar ese xulgado de Lugo por que razón outros investigan sen que eles fagan nada, pero isto queda sobre a conciencia dos xuíces de turno.

Pola contra, sería evidente que se un xulgado de Ourense fixese isto se estaría saltando os principios básicos dun proceso penal democrático. Terá razón, pero sabemos que non é competente e está facendo nulo un proceso que debería levar á condena dos culpables.

Hai pouco, vendo un expediente, fiquei asombrado cando comprobei que a concelleira de turno decidía, en lugar de resolver cos seus técnicos, encargarlle a un despacho externo a solución do recurso administrativo. Algo que calquera que teña un pouco de respecto á función pública e ao Estado non faría. Se, por riba, esa concelleira contrata ese mesmo avogado a quen lle desviaba os asuntos do seu concello para que a defenda, salta completamente a legalidade. Por menos están imputados os concelleiros de Santiago.

Entrementres, os tribunais que instrúen son postos en tela de xuízo porque alguén, inexplicablemente, pensa que non son imparciais ou que buscan protagonismo.

Señores, para iso están as recusacións, para que un tribunal xulgue se hai causa para apartar un xuíz do proceso. Porque, a ver, que pensan? Que unha recusación se resolve polo mesmo xuíz recusado? Que empregan acaso o membrete do propio tribunal cuestionado? Non é así.

Calquera que estea relacionado cos tribunais sabe perfectamente como funcionan as cousas, calquera que estea relacionado cos tribunais sabe como son as asociacións de xuíces. E se a APM sae en defensa dos instrutores por algo será.

O problema é que esta é a nosa xustiza. Así nos vai.

*Artigo publicado en La Voz de Galicia o 24 de maio de 2014